ციფრული აგროპლატფორმის პროტოტიპის პირველადი ვერსიის პრეზენტაცია პროგრამის „მრავალმხრივი საფრთხეების ადრეული გაფრთხილების სისტემის გაფართოება და კლიმატთან დაკავშირებული ინფორმაციის გამოყენება საქართველოში“ სამუშაო ჯგუფის შეხვედრაზე გაიმართა. შეხვედრას  სოფლის განვითარების სააგენტოს დირექტორის  პირველი მოადგილე გიორგი ფანცულაია და დირექტორის მოადგილე გიორგი ჯიბლაძე ესწრებოდნენ.

სამუშაო ჯგუფის წევრებს საერთაშორისო კონსულტანტმა  კვანგ-ჰიუნ კიმმა ვებ-აპლიკაციაზე დაფუძნებული GECSA-ს  ციფრული აგროპლატფორმის პროტოტიპის პირველადი ვერსია  წარუდგინა. 

პლატფორმა, რომლის სატესტო ვერსია  ხელმისაწვდომი 2024 წლის შემოდგომიდან იქნება, ფერმერებს  მიაწვდის რეკომენდაციებს მოსალოდნელი ამინდის გათვალისწინებით ჩასატარებელი  აგროსამუშაოების  განხორციელების შესახებ.

გასატარებელი აგროოპერაციების შესახებ რეკომენდაციები დაეგზავნება პროგრამის მიზნობრივი რეგიონებიდან, კახეთიდან და შიდა ქართლიდან, შერჩეული კულტურების, კერძოდ, ვაშლის, ვაზის, ატმისა და ნექტარინას, ხორბლის, სიმინდის მწარმოებლებს, სასოფლო-სამეურნეო პროდუქციის  რაოდენობრივი და ხარისხობრივი ზრდის უზრუნველსაყოფად.

პროგრამის  სამუშაო ჯგუფის შეხვედრას სოფლის განვითარების სააგენტოს, სურსათის ეროვნული სააგენტოს და  გაეროს განვითარების პროგრამის (UNDP) წარმომადგენლები  ესწრებოდნენ.

აღნიშნული პროგრამა  პროექტის „კლიმატის ცვლილებით გამოწვეული კატასტროფების რისკის შემცირება საქართველოში“ ნაწილია, რომელიც   ხორციელდება  გაეროს განვითარების პროგრამის (UNDP) მიერ, კლიმატის მწვანე ფონდის (GCF), საქართველოს, შვედეთისა და შვეიცარიის მთავრობების ხელშეწყობით.