თანამედროვე სტანდარტებით აღჭურვილი ხილის გადამამუშავებელი საწარმო შპს იბერია ფრუიტს შეიქმნა 2016 წელს, დუშეთის მუნიციპალიტეტში, ა(ა)იპ "სოფლის მეურნეობის პროექტების მართვის სააგენტოს" ფინანასური დახმარების პროგრამის ხელშეწყობით. შპს იბერია ფრუიტსი ყიდულობს ხილს 30-მდე ადგილობრივი ფერმერისგან, ხოლო მთლიანობაში საქართველოს მასშტაბით 120 ფერმერამდე აწვდის კომპანიას ხილს. კომპანიაში დასაქმებულია 14 ადამიანი და წლიურად აწარმოებს 110-120 ტონა სხვადასხვა სახეობის მშრალ პროდუქტებს, ამჟამად პროდუქციის რეალიზება ხდება ძირითადად საზღვარგარეთ. 2017 წლის იანვარში, ბრიტანულმა კომპანიამ Lloyds Register Assurance Quality შპს იბერია ფრუიტს მიანიჭა ISO 22000:2005 სერთიფიკატი. ეს შესაძლებელი გახდა USAID/REAP-ის და ა(ა)იპ სოფლის მეურნეობის პროექტების მართვის სააგენტოს თანამშრომლობის ფარგლებში, რომელიც მიზნად ისახავს USAID/REAP-ის და სააგენტოს ერთობლივი ძალისხმევით და თანადაფინანსებით (50% - USAID/REAP, 30% - სააგენტო და 20%- კომპანია) ბენეფიციარ საწარმოებში სურსათის უვნებლობის მართვის სისტემების და სტანდარტების დანერგვას. მოსალოდნელია, რომ სერტიფიცირების შედეგად შპს იბერია ფრუიტს შეძლებს დაამყაროს ბიზნეს-კონტაქტები უფრო მეტ უცხოელ მყიდველთან. USAID/REAP-ის და სააგენტოს თანამშრომლობის შესახებ შეთანხმების ფარგლებში, ამჟამად, USAID/REAP და სააგენტო 13 აგრობიზნესს უწევენ დახმარებას HACCP სისტემის და ISO 22 000 სტანდარტის დანერგვაში.