დედოფლისწყაროს მუნიციპალიტეტში, სოფლის განვითარების პროგრამის ფინანსური მხარდაჭერით, 50 მოსწავლეზე გათვლილი ინგლისური ენის სასწავლო ცენტრი შპს ეს სასწავლო ცენტრმა გახსნა. ცენტრის მოსაწყობად სრული ინვესტიცია 57,000 ლარი განხორციელდა, საიდანაც 45,000 ლარი სოფლის განვითარების პროგრამის გრანტია. სასწავლო ცენტრში 5 ადგილობრივია დასაქმებული.

სოფლის განვითარების პროგრამას სოფლის განვითარების სააგენტო (RDA) ევროკავშირისა (EU) და გაეროს განვითარების პროგრამის (UNDP) მხარდაჭერით სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში ახორციელებს.

სოფლის განვითარების სააგენტოს დირექტორი ილია თამარაშვილი, საქართველოში ევროკავშირის წარმომადგენლობის სოფლის განვითარების, სამოქალაქო უსაფრთხოებისა და კრიზისების მართვის პროგრამების მენეჯერი ქეთევან ხუციშვილი, გაეროს განვითარების პროგრამის (UNDP) პროექტის სოფლის განვითარების გაუმჯობესება საქართველოში მენეჯერი ნოდარ კერესელიძე და კახეთის მხარის სახელმწიფო რწმუნებულის მოადგილე ლევან ლილუაშვილი დედოფლისწყაროს მუნიციპალიტეტში იმყოფებოდნენ, სადაც ახლადგახსნილი სასწავლო ცენტრი დაათვალიერეს.

სოფლის განვითარების პროგრამა ქედას, ხულოს, ბორჯომის, ახალქალაქის, თეთრიწყაროს, ყაზბეგის, ლაგოდეხისა და დედოფლისწყაროს მუნიციპალიტეტებში ხორციელდება. პროგრამის მიზანია სოფლად არასასოფლო-სამეურნეო სამეწარმეო საქმიანობის განვითარების მხარდაჭერა. პროგრამის ფარგლებში დაფინანსებულია 48 პროექტი, ინვესტიციის ჯამური ღირებულება 7 მლნ ლარს აჭარბებს, თანადაფინანსება 5 მილიონ ლარზე მეტია.