ქვეკომპონენტი თხილის პირველადი წარმოების დაფინანსებისთვის

ქვეკომპონენტის ფარგლებში სესხები გაიცემა თხილის პირველად მწარმოებლებზე, რომელნიც აღრიცხული იქნებიან „თხილის წარმოების ხელშეწყობის პროგრამის“ ფარგლებში შექმნილ თხილის ბაღების კადასტრში და რომელთაც გააჩნიათ ჯამურად არანაკლებ 3 ჰა ფართობის მიწის ნაკვეთ(ებ)ი, რომელზეც ინტენსიურად, ნახევრად ინტენსიურად ან ტრადიციულად არის გაშენებული თხილის კულტურა. 

ქვეკომპონენტის ფარგლებში სესხები გაიცემა შემდეგი მიზნობრიობებით:

• თხილის პირველადი წარმოებისთვის საჭირო პესტიციდების, ორგანული და მინერალური სასუქების, მცენარეთა დაცვის ბიოლოგიური საშუალებების მიმდინარე ხარჯების დაფინანსება;
• თხილის პირველადი წარმოებისთვის შრომითი რესურსებისა და სასოფლო-სამეურნეო ტექნიკის დაქირავება სასოფლო-სამეურნეო სამუშაოებისთვის;
• თხილის პირველადი წარმოებისთვის სასოფლო-სამეურნეო სამუშაოებისთვის გამოყენებული ტექნიკის საწვავ-საცხები მასალების მიმდინარე ხარჯების დაფინანსება. 

ქვეკომპონენტით სარგებლობა შეუძლიათ შემდეგ პირებს: 

• საქართველოს მოქალაქე ფიზიკურ პირს;
• საქართველოს კანონმდებლობის შესაბამისად რეგისტრირებულ ინდივიდუალურ მეწარმეს;
• საქართველოს კანონმდებლობის შესაბამისად რეგისტრირებულ იურიდიულ პირს (გარდა სახელმწიფო/მუნიციპალური საწარმოებისა). 

ქვეკომპონენტის ფარგლებში ერთ ბენეფიციარზე გაცემული სესხის თანხა 5,000 ლარიდან 300,000 ლარის ჩათვლით შეადგენს.

საფინანსო ინსტიტუტის მიერ ამ ქვეკომპონენტის ფარგლებში ბენეფიციარზე გაცემული სესხის სარგებლობისათვის განსაზღვრული წლიური საპროცენტო განაკვეთი არ უნდა აღემატებოდეს 18%-ს. 

სესხის ვადისა და გადახდის გრაფიკის განსაზღვრა ხდება ბენეფიციარისა და კრედიტის გამცემი საფინანსო ინსტიტუტის შეთანხმების საფუძველზე. 

სააგენტო მოახდენს ქვეკომპონენტის ფარგლებში გაცემული სესხის არა უმეტეს 12 თვის პროცენტის თანადაფინანსებას წლიური 8%-ის ოდენობით, სესხის გაცემიდან არა უმეტეს მომდევნო 14 თვის განმავლობაში. 

თხილის პირველადი წარმოებისთვის მაქსიმალურ სესხის მოცულობა 1 ჰა-ზე გადაანგარიშებით არ უნდა აღემატებოდეს 3,000 ლარს.

სესხის ის პირობები, რაც არ არის გათვალისწინებული ამ მუხლით, დარეგულირდება საბრუნავი საშუალებების კომპონენტით დადგენილი საერთო პირობებით.