მსხვილფეხა მეცხოველეობის ფერმის მოწყობის ქვეკომპონენტი ითვალისწინებს შემდეგი მიმართულებების თანადაფინანსებას:

• მერძეული, მეხორცული, კომბინირებული ჯიშის მსხვილფეხა პირუტყვის ახალი ფერმის მოწყობას ან არსებული ფერმის გაფართოებას და/ან მოდერნიზებას;
• სასუქი მსხვილფეხა პირუტყვის ახალი ფერმის მოწყობას.

ქვეკომპონენტით სარგებლობა შეუძლია რეგისტრირებულ მეწარმე ფიზიკურ პირს (ინდივიდუალურ მეწარმეს) ან  მეწარმე იურიდიულ პირს, რომელშიც  სახელმწიფო არ ფლობს წილს/პაის/აქციას. 

ამასთანავე, აუცილებელია პოტენციური ბენეფიციარი დარეგისტრირდეს:

• ფერმერული მეურნეობებისა და სოფლად არსებული საწარმოების რეესტრში
• სსიპ – საჯარო რეესტრის ეროვნული სააგენტოს ეკონომიკურ საქმიანობათა რეესტრში

გავრცელების არეალი

ქვეკომპონენტის გავრცელების გეოგრაფიული არეალია საქართველოს ყველა მუნიციპალიტეტი.

მერძეული, მეხორცული, კომბინირებული ჯიშის მსხვილფეხა პირუტყვის ახალი ფერმის მოწყობა ან არსებული ფერმის გაფართოებას და/ან მოდერნიზება

სააგენტოს თანადაფინანსება: პროექტის ჯამური ღირებულების არაუმეტეს 50%, მერძეული ჯიშის შემთხვევაში − არაუმეტეს 10,000,000 ლარი, ხოლო მეხორცული, კომბინირებული ჯიშის შემთხვევაში − არაუმეტეს 2,000,000 ლარი.

სასოფლო-სამეურნეო სტატუსის მქონე კოოპერატივების, გამყოფი ხაზის მიმდებარე სოფლებისა და მაღალმთიანი დასახლებების შემთხვევაში − არაუმეტეს 55%,  მერძეული ჯიშის შემთხვევაში − არაუმეტეს 10,000,000 ლარი, ხოლო მეხორცული, კომბინირებული ჯიშის შემთხვევაში − არაუმეტეს 2,000,000 ლარი.

პროექტის ჯამური ღირებულება უნდა შეადგენდეს ახალი ფერმის მოწყობის შემთხვევაში არანაკლებ 100,000 ლარს, არსებული ფერმის  გაფართოების და/ან მოდერნიზების შემთხვევაში არანაკლებ 50,000 ლარს.

ფერმის მოსაწყობად და მსხვილფეხა პირუტყვის შესაძენად პროექტის ჯამური ღირებულება ერთ სულ ფურზე/უშობელზე გადაანგარიშებით, არ უნდა აღემატებოდეს 30,000 ლარს, მათ შორის, მსხვილფეხა პირუტყვის შესაძენად − არაუმეტეს 11,000 ლარს.

დაფინანსდება მხოლოდ დანართით N7 განსაზღვრული კრიტერიუმებისა და ხარჯების შესაბამისად   მერძეული, მეხორცული, კომბინირებული ჯიშის მსხვილფეხა პირუტყვის ახალი ფერმის მოწყობა.

დაფინანსდება მხოლოდ დანართით N8  განსაზღვრული კრიტერიუმებისა და ხარჯების შესაბამისად  მერძეული, მეხორცული, კომბინირებული ჯიშის მსხვილფეხა პირუტყვის არსებული ფერმის   მოდერნიზაცია/ გაფართოება

მიმართულების კრიტერიუმები და ვალდებულებები

ბენეფიციარი ვალდებულია, თანადაფინანსების გაცემამდე შეიძინოს და/ან იყოლიოს არანაკლებ 25 უშობელი და/ან ფური მსხვილფეხა პირუტყვი, N7-N8 დანართებით  განსაზღვრული ჯიშ(ებ)ის შესაბამისად.

მსხვილფეხა პირუტყვის შეძენა უნდა განხორციელდეს სსიპ – სოფლის მეურნეობის სამეცნიერო-კვლევითი ცენტრის მიერ დადგენილი სანაშენე სტატუსის მქონე ფერმებიდან და/ან იმპორტის გზით,  რომლებსაც უნდა გააჩნდეს შესაბამისი პასპორტი (სანაშენე ბარათი).

კუროს შეძენა დასაშვებია მხოლოდ მეხორცული მიმართულების შემთხვევაში, პროპორციით − 30 ფურზე/1 კურო.  

ბენეფიციარი ვალდებულია:

• თანადაფინანსების გაცემამდე კუთვნილი მსხვილფეხა პირუტყვი დაარეგისტრიროს საქართველოს ცხოველთა იდენტიფიკაციისა და მიკვლევადობის ეროვნულ სისტემაში (NAITS);
• თანადაფინანსების გაცემიდან 3 წლის განმავლობაში შეინარჩუნოს თანადაფინანსების გაცემამდე არსებული მსხვილფეხა პირუტყვის ჯამური სულადობა, ხოლო მსხვილფეხა პირუტყვის დაკვლის ან დაცემის შემთხვევაში, თავად უზრუნველყოს შესაბამისი ჯიშებით ჩანაცვლება და ყოველწლიურად უზრუნველყოს თანადაფინანსების გაცემამდე არსებული მსხვილფეხა პირუტყვის სულადობის დამადასტურებელი დოკუმენტის წარმოდგენა.

სასუქი მსხვილფეხა პირუტყვის ახალი ფერმის მოწყობა 

მიმართულება ითვალისწინებს ახალი ღია და/ან დახურული ტიპის ფერმის/სადგომის მოწყობის თანადაფინანსებას.  

სააგენტოს თანადაფინანსება: პროექტის ჯამური ღირებულების 50%, მაგრამ არაუმეტეს 1,000,000 ლარი.

სასოფლო-სამეურნეო სტატუსის მქონე კოოპერატივების, გამყოფი ხაზის მიმდებარე სოფლებისა და მაღალმთიანი დასახლებების შემთხვევაში − არაუმეტეს 55%, არაუმეტეს 1,000,000 ლარი.

პროექტის ჯამური ღირებულება უნდა შეადგენდეს არანაკლებ 100,000 ლარს.

პროექტის ჯამური ღირებულება, ერთ სულ მსხვილფეხა პირუტყვზე გადაანგარიშებით, არ უნდა აღემატებოდეს 2,000 ლარს.

დაფინანსდება მხოლოდ დანართით N9  განსაზღვრული კრიტერიუმებისა და ხარჯების შესაბამისად  სასუქი მსხვილფეხა პირუტყვის ღია და/ან დახურული ტიპის ფერმის/სადგომის მოწყობა.

მიმართულების ვალდებულებები 

სასუქი მსხვილფეხა პირუტყვის ახალი ფერმის მოწყობის მიმართულების მიზნობრიობაა ღია და/ან დახურული ტიპის ფერმის/სადგომის მოწყობა.

თანადაფინანსების გაცემამდე ბენეფიციარი ვალდებულია:

• იყოლიოს არანაკლებ 100 მსხვილფეხა მოზარდი პირუტყვი;
• მოაწყოს არანაკლებ 100 მოზარდი მსხვილფეხა პირუტყვისთვის ფერმა, განსაზღვრული კრიტეტიუმები იხილეთ დანართში N9;
• კუთვნილი მსხვილფეხა პირუტყვი დაარეგისტრიროს საქართველოს ცხოველთა  იდენტიფიკაციისა და მიკვლევადობის ეროვნულ სისტემაში (NAITS);

თანადაფინანსების გაცემის შემდეგ, ბენეფიციარი ვალდებულია 3 წლის განმავლობაში ყოველწლიურად უზრუნველყოს თანადაფინანსების გაცემამდე არსებული მსხვილფეხა მოზარდი პირუტყვის სულადობის დამადასტურებელი დოკუმენტის წარმოდგენა.

პროექტის განხორციელების ვადა

სააგენტო ბენეფიციარს განუსაზღვრავს პროექტის შესრულების ვადას. 

პროექტის შესრულების ვადა არ უნდა აღემატებოდეს ხელშეკრულების გაფორმებიდან 18 თვეს. 

განსაზღვრულ ვადებში პროექტის შეუსრულებლობის შემთხვევაში სააგენტო წყვეტს ბენეფიციართან გაფორმებულ ხელშეკრულებას. 

ზოგადი პირობები:

• მონაწილეობას შეძლებენ ის პოტენციური ბენეფიციარები, რომლებსაც არ აქვთ სოფლის განვითარების სააგენტოს პროექტების/პროგრამების ფარგლებში მიმდინარე სახელშეკრულებო დარღვევა ან/და სასამართლო დავა.
• წარმოდგენილი პროექტის ჯამური ღირებულება უნდა მოიცავდეს ქვეკომპონენტის შესაბამისად დასაშვები ხარჯების მთლიან ოდენობას.
• შესაძლებელია დაფინანსდეს აუდიტორული დასკვნის საფასური, თანადაფინანსება შეადგენს პროექტის ღირებულების არაუმეტეს 1%, მაგრამ არაუმეტეს 20,000 ლარს. თანადაფინანსების თანხა გათვალისწინებული იქნება ბენეფიციარზე გასაცემი სააგენტოს თანადაფინანსების ლიმიტში. 
• ბენეფიციარის მიერ პროექტით გათვალისწინებული ნებისმიერი შესყიდვა უნდა განხორციელდეს მხოლოდ ხელშეკრულების გაფორმების შემდეგ, საქართველოს კანონმდებლობით დადგენილი წესით რეგისტრირებული მეწარმე ფიზიკური ან/და იურიდიული პირისაგან ან/და იმპორტის გზით.
  მომსახურების შესყიდვის შემთხვევაში, შესაძლებელია შესყიდვა განხორციელდეს ფიზიკური პირისგანაც.
• შესასყიდი ძირითადი საშუალებები (დანადგარი/აღჭურვილობა/ტექნიკა/იმპლემენტი) უნდა იყოს ახალი (ექსპლუატაციაში არმყოფი). 
• პოტენციური ბენეფიციარი ვერ მიიღებს პროგრამაში მონაწილეობას და ბენეფიციარზე თანადაფინანსება არ გაიცემა თუ: 
  • პოტენციური ბენეფიციარი ან არსებული ბენეფიციარი, მისი დამფუძნებელი, მეპაიე ან აქციონერი, ფლობს წილს საქართველოს კანონმდებლობის შესაბამისად რეგისტრირებულ იმ იურიდიულ პირში, რომელიც პროექტის ფარგლებში წარმოადგენს შესაბამისი საქონლის და/ან მომსახურების მიმწოდებელს;
  • თავად ინდივიდუალური მეწარმე წარმოაჩენს საკუთარ თავს საქონლის და/ან მომსახურების მიმწოდებლად;
  • პოტენციური ბენეფიციარი/ბენეფიციარი ან მისი წარომადგენელი არის ხელმძვანელი საქონლის და/ან მომსახურების მიმწოდებელ კომპანიაში.
  • ის ბენეფიციარები, ვისთანაც გაფორმდება თანადაფინანსების ხელშეკრულება, თანადაფინანსებას მიიღებენ იმ შემთხვევაში, თუ ამ დადგენილების ამოქმედების შემდეგ ა(ა)იპ − სოფლის განვითარების სააგენტოს პროექტების/პროგრამების ფარგლებში არ ექნებათ მიმდინარე სახელშეკრულებო დარღვევა ან/და სასამართლო დავა.

ზოგადი ვალდებულებები

ბენეფიციარი ვალდებულია:  

• თანადაფინანსების გაცემის დღიდან 3 წლის განმავლობაში, არ გაასხვისოს პროექტის ფარგლებში შექმნილი და დაფინანსებული ქონება, ასევე აღნიშნული ქონების ნაწილი ან მასთან დაკავშირებული აქტივები და მიწის ნაკვეთი, რომელზეც განხორციელდა პროექტი.  

დარღვევის შემთხვევაში, სააგენტო წყვეტს ხელშეკრულებას და ბენეფიციარი ვალდებულია უზრუნველყოს მიღებული თანადაფინანსების თანხის დაბრუნება.

• თანადაფინანსების გაცემის დღიდან 3 წლის განმავლობაში, უზრუნველყოს პროექტის ფუნქციონირება მხოლოდ იმ მიზნობრიობისა და პროფილის შესაბამისად, რომელიც განსაზღვრულია პროგრამითა და/ან ხელშეკრულებით.
• მშენებლობის შემთხვევაში, სააგენტოს მიერ განსაზღვრულ ვადაში წარმოადგინოს პროექტის ფარგლებში შექმნილი შენობა/ნაგებობის ექსპლუატაციაში მიღების აქტი.
• უზრუნველყოს ხელშეკრულებით განსაზღვრული პერიოდულობით ინფორმაციის სააგენტოსთვის წარდგენა პროექტის მიმდინარეობის შესახებ. 

ზემოაღნიშნული პირობების დარღვევის შემთხვევაში სააგენტო წყვეტს ხელშეკრულებას და ბენეფიციარი ვალდებულია უზრუნველყოს მიღებული თანადაფინანსების თანხის დაბრუნება  ან სააგენტო უფლებამოსილია განუსაზღვროს ბენეფიციარს დამატებითი ვადა ვალდებულების შესასრულებლად. 

შესაბამისობის კრიტერიუმები

მიწის ნაკვეთი, სადაც იგეგმება პროექტის განხორციელება პოტენციურ ბენეფიციარს უნდა გააჩნდეს  საკუთრებაში ან თანასაკუთრებაში ან იჯარით, რომელიც:

• რეგისტირებული უნდა იყოს სსიპ − საჯარო რეესტრის ეროვნულ სააგენტოში ან/და მიღებული უნდა ჰქონდეს სახელმწიფოსგან/მუნიციპალიტეტის ორგანოსგან/აჭარის ავტონომიური რესპუბლიკისგან გრძელვადიანი იჯარით.
• იჯარის დარჩენილი პერიოდი უნდა შეადგენდეს არანაკლებ 10 წელს 
• მიწის ნაკვეთს არ უნდა ედოს ყადაღა, ასევე, სახელმწიფოსგან საპრივატიზებო პირობებით შეძენის შემთხვევაში,  საპრივატიზებო პირობები უნდა იყოს სრულად შესრულებული და მიწის ნაკვეთი უნდა წარმოადგენდეს შემძენის უპირობო საკუთრებას.  

პოტენციურ ბენეფიციარს არ უნდა გააჩნდეს საგადასახადო დავალიანება სახელმწიფო ბიუჯეტის მიმართ. ეს მოთხოვნა არ ვრცელდება იმ შემთხვევაში, თუ საგადასახადო დავალიანების ოდენობა არ აღემატება 1,000 ლარს ან საგადასახადო დავალიანების გადახდევინება გადავადებულია ან მისი გადახდის ვალდებულება შეჩერებულია კანონის საფუძველზე.

თანადაფინანსების მისაღებად საჭირო ეტაპები

მსხვილფეხა მეცხოველეობის ფერმის  მოწყობის ქვეკომპონენტი, მერძეული, მეხორცული, კომბინირებული ჯიშის მსხვილფეხა პირუტყვის ახალი ფერმის მოწყობის ან არსებული ფერმის გაფართოების და/ან მოდერნიზების მიმართულებით წარმოსადგენი დოკუმენტების ნუსხა

სასუქი მსხვილფეხა პირუტყვის ახალი ფერმის მოწყობის მიმართულებით წარმოსადგენი დოკუმენტების ნუსხა

თანადაფინანსება გაიცემა მას შემდეგ, რაც ხელშეკრულებით გათვალისწინებულ ვადაში ვალდებულებების შესრულება დადასტურდება წარმოდგენილი აუდიტორული დასკვნითა და სააგენტოს მიერ ადგილზე კონტროლის  განხორციელებით. 

მშენებლობის შემთხვევაში, უნდა წარმოადგინოთ საქართველოს კანონმდებლობით გაცემული მშენებლობის ნებართვა. 

არანაკლებ 200,000 ლარის ღირებულების სამშენებლო/სარემონტო/სარეკონსტრუქციო სამუშაოების შემთხვევაში, შესრულებული სამუშაოების ღირებულება უნდა დასტურდებოდეს:

• სსიპ - აკრედიტაციის ეროვნულო ორგანოს (აკრედიტაციის ცენტრის) მიერ აკრედიტირებული პირის დასკვნით
  ან 
• სსიპ - ლევან სამხარაულის სახელობის სასამართლო ექსპერტიზის ეროვნული ბიუროს მიერ გაცემული ექსპერტიზის დასკვნით

არანაკლებ 500,000 ლარის პროექტის ღირებულების შემთხვევაში ბენეფიციარი ვალდებულია თანადაფინანსების გაცემამდე, ხელშეკრულების მოქმედების ვადით, ის მიწის ნაკვეთი, რომელზეც განხორციელდა  პროექტი დატვირთოს  იპოთეკით სააგენტოს სასარგებლოდ საქართველოს კანონმდებლობის შესაბამისად. 

ამავდროულად, დასაშვებია სააგენტოს იპოთეკა იყოს რიგით მეორე, მხოლოდ იმ შემთხვევაში, თუ პირველი რიგის იპოთეკარია სესხის გამცემი ბანკი. 

აღნიშნული პირობა არ ვრცელდება სახელმწიფო იჯარის შემთხვევაში.  

სააგენტო უფლებამოსილია, ხელშეკრულების მოქმედების პერიოდში განახორციელოს ადგილზე კონტროლი და დოკუმენტური მონიტორინგი.